‘अनफलो’ अभियानः ओलीले ७७ हजार फलोअर्स गुमाउँदा बालेनका १ लाख थपिए

हेटौंडा । काठमाडौँ महानगर पालिकाका मेयर बालेन्द्र शाह (बालेन) का समर्थकले प्रधानमन्त्री केपी शर्मा ओलीलाई सामाजिक सञ्जाल फेसबुकमा ‘अनफलो’ गर्ने अभियान चलाएपछि ओलीले झण्डै ७७ हजार फलोअर्स गुमाएका छन्। ओलीका फलोअर्स घट्दा बालेनका भने एक लाख फलोअर्स बढेका छन्।

बालेन समर्थले मंगलबारदेखि सुरु गरेको यो अभियानको प्रभावस्वरुप दुईदिनमै एमाले अध्यक्षसमेत रहेका ओलीलाई ७७ हजारले अनफलो गरेका हुन्। मंगलबार र बुधबार धेरै फलोअर्स गुमाएका ओलीलाई आज भने अनफलो गर्ने घट्न थालेको छ।

बालेनका समर्थकले ओलीविरुद्ध यो अभियान चलाउनुअघि सामाजिक सञ्जाल फेसबुकमा उनका फलोअर्स ६ लाख ६६ हजार थिए। बिहीबार बिहानसम्म उनका फलोअर्स ७७ हजार घटेर ५ लाख ८९ हजारमा झरेको छ। बालेनका समर्थको यो अभियानपछि धेरैले नेपालको राजनीतिमा सक्रिय कुन दलका नेताका फलोअर्स कति छन् भन्ने खोजी गर्न थालेका छन्।

काठमाडौँका मेयर बालेनका फलोअर्स भने फेसबुकमा २१ लाख छन्। जनप्रतिनिधिमा सबैभन्दा धेरै फलोअर्स हुने नेतामा पर्छन् बालेन। उनको कुनै दल छैन। उनी स्वतन्त्र मेयर हुन्। बालेन समर्थकको यो अभियानपछि बालेनका फलोअर्स भने १ लाख बढेको छ। यसअघि उनका फलोअर्स २० लाख थिए।

हाल सक्रिय राजनीतिमा रहेका प्रमुख दलका शीर्ष नेतामध्ये सबैभन्दा धेरै फलोअर्स भएका नेता नेपाल समाजवादी पार्टी ९नेसपा०का अध्यक्ष तथा पूर्वप्रधानमन्त्री डा। बाबुराम भट्टराई हुन्। फेसबुकमा उनका १४ लाख फलोअर्स छन्।

त्यसैगरी फलोअर्स धेरै हुने राजनीतिक दलका दोस्रो नेतामा राष्ट्रिय स्वतन्त्र पार्टी ९रास्वपा०का सभापति रवि लामिछाने पर्छन्। फेसबुकमा उनका फलोअर्स १२ लाख ९० हजार भन्दा धेरै छन्।

त्यसैगरी जनमत पार्टीका अध्यक्ष सीके राउत पनि धेरै फलोअर्स भएका नेतामा पर्छन्। सामाजिक सञ्जालमा उनका फलोअर्स ६ लाख ६७ हजार छ।

त्यसैगरी पूर्व प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल प्रचण्डलाई फेसबुकमा ५ लाख ७६ हजारले फलो गरेका छन्। बालेन समर्थकको अलफलो अभियानपछि प्रचण्डको फेसबुकमा ६ हजार फलोअर्स थपिएका छन्। यसअघि उनका ५ लाख ७० हजार फलोअर्स थिए।

पूर्व प्रधानमन्त्रीसमेत रहेका कांग्रेस सभापति शेरबहादुर देउवालाई २ लाख ६५ हजारले फेसबुकमा फलो गरेका छन्। अर्का पूर्वप्रधामन्त्रीसमेत रहेका नेकपा एकीकृत समाजवादीका अध्यक्ष माधवकुमार नेपालका फेसबुकमा फलोअर्स १ लाख ९२ हजार छन्।

त्यस्तै राप्रपा अध्यक्ष राजेन्द्र लिङ्ग्देनको फेसबुक फलोअर्स संख्या १ लाख ५० हजार छ भने जसपा नेपालका अध्यक्ष उपेन्द्र यादवलाई २६ हजारले मात्रै फेसबुमा फलो गरेका छन्। त्यसैगरी जसपा अध्यक्ष अशोक राईका फलोअर्स ७ हजार ३ सय छन्।

धेरै फलोअर्स हुने जनप्रतिनिधिमा सुनसरीको धरानका मेयर हर्क सम्पाङ पनि पर्छन्। फेसबुकमा उनका फलोअर्स ८ लाख ६८ हजार छ। त्यस्तै धनगढीका मेयर गोपी हमाललाई ३ लाख ६ हजारले फेसबुकमा फलो गरेका छन्।