भारतीय विदेशमन्त्री जयशङ्कर स्वदेश फिर्ता

काठमाडौं । भारतीय विदेशमन्त्री एस जयशङ्कर स्वदेश फर्किएका छन् ।

परराष्ट्रमन्त्री एनपी साउदको निमन्त्रणामा दुई दिने नेपालको औपचारिक भ्रमणमा आएका जयशङ्करलाई त्रिभुवन अन्तर्राष्ट्रिय विमानस्थलमा परराष्ट्रसचिव सेवा लम्सालले बिदाइ गरेकी थिइन् ।

नेपाल–भारत संयुक्त आयोगको सातौं बैठकमा भाग लिन विदेशमन्त्री जयशङ्कर बिहीवार नेपाल आएका थिए ।

बैठकमा विकास साझेदारीसहित द्विपक्षीय सहकार्यका सबै पक्षमाथि समीक्षा हुनाका साथै बैठकपश्चात्, भारतीय विदेशमन्त्री र नेपालका परराष्ट्रमन्त्रीको उपस्थितिमा दुई पक्षबीच विभिन्न महत्वपूर्ण सहमति पत्र र समझदारी पत्रको आदानप्रदान भएको थियो ।

भ्रमणका क्रममा विदेशमन्त्री जयशङ्करले राष्ट्रपति रामचन्द्र पौडेल र प्रधानमन्त्री पुष्पकमल दाहाल ‘प्रचण्ड’ तथा यहाँका उच्च राजनीतिक नेतृत्वसँग छुट्टाछट्टै भेटवार्ता गरेका थिए ।

‘छिमेकी पहिलो’ नीतिअन्तर्गत नेपाल भारतको प्राथमिकतामा पर्ने साझेदार हो । दुई घनिष्ठ र मित्रवत् छिमेकीबीच उच्चस्तरीय भेटघाट गर्ने परम्परालाई ध्यानमा राख्दै मन्त्री जयशङ्करको भ्रमण भएको भारतीय पक्षले जनाएको छ ।