काठमाडौँको रानीबारीमा जुवातास खेलिरहेका ९ जना पक्राउ

काठमाडौँ। काठमाडौँ महानगरपालिका–३ सामाखुसी रानीबारीमा जुवातास खेलिरहेको अवस्थामा ९ जना पक्राउ परेका छन् । ५८ वर्षीय डम्बर लामाले आफ्नै घरमा सञ्चालन गरेको खुसी किचेन रेष्टुरेन्टमा जुवातास खेलिरहेको अवस्थामा होटल सञ्चालक लामा समेत ९ जनालाई शनिबार साँझ प्रहरीले पक्राउ गरेको हो । प्रहरी वृत्त महाराजगन्जबाट खटिएको प्रहरीले उनीहरूको साथबाट ६२ हजार ८ सय रूपैयाँ नगद र ३ बुक तास बरामद गरेको छ । उता, कास्कीको पोखरा महानगरपालिका–५ प्रस्याङस्थित साथीभाइ खाजा घरमा जुवातास खेलिरहेको अवस्थामा सोही महानगरपालिका-१८ सराङकोट बस्ने ३४ वर्षीय महेश तिमिल्सिना समेत ५ जनालाई शनिबार दिउँसो प्रहरीले पक्राउ गरेको छ । जिल्ला प्रहरी कार्यालय कास्कीबाट खटिएको प्रहरीले उनीहरूलाई नगद २५ हजार २ सय ७५ र तास ३ बुक सहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।