हेटौँडामा अन्तर्राष्ट्रिय स्तरको डेलिभरी सेवा सहित एजी एक्सप्रेसको नयाँ शाखा बिस्तार
मकवानपुर, हेटौँडा — अन्तर्राष्ट्रिय स्तरको डेलिभरी तथा कुरियर सेवा प्रदान गर्ने एजी एक्सप्रेसले हेटौँडामा आफ्नो नयाँ शाखा सञ्चालनमा ल्याएको छ। आजको उद्घाटन कार्यक्रम पूर्व प्रतिनिधिसभा सदस्य दीपकबहादुर सिंहले गरेका छन्।
उक्त अवसरमा बोल्दै पूर्व सांसद् सिंहले मकवानपुरका घरेलु उद्योग सञ्चालकहरूका लागि एजी एक्सप्रेसले विदेशसम्म उत्पादन पुर्याउने सजिलो माध्यम प्रदान गर्ने बताए। उनले महिलाहरूले वडा समूहबाट उत्पादन गरी गुणस्तरीय सामान बनाउन सके विदेशमा पठाउन झन्झट नहुने पनि उल्लेख गरे।
कार्यक्रममा कम्पनीका ग्लोबल सीईओ तथा अध्यक्ष तुलसी उप्रेतीले हेटौँडा शाखामार्फत मकवानपुर र आसपासका क्षेत्रमा अन्तर्राष्ट्रिय स्तरको सेवा उपलब्ध गराइने जानकारी दिए। उनले कम्पनी हङकङबाट सुरु भएर अहिले विश्वभर विस्तार हुँदै गएको र हेटौँडामा यो कम्पनीको १६औँ शाखा भएको बताए।
एजी एक्सप्रेसले नेपाली तथा प्रवासी नेपाली समुदायलाई लक्षित गरी मात्र सेवा दिन नभई उनीहरूलाई विश्वसँग जोड्ने उद्देश्य राखेको छ। हस्तकला, निप्पर, मसला, लत्ताकपडा तथा खाद्यान्न जस्ता उत्पादन विदेशमा रहेका नेपालीसम्म पुर्याउने माध्यम बन्ने कम्पनीको लक्ष्य रहेको छ।
सीईओ उप्रेतीले भ्याट तथा टीडीएस पारदर्शी रूपमा बुझाउँदै राष्ट्र निर्माणमा योगदान पुर्याउन प्रतिबद्धता व्यक्त गरे। कार्यक्रममा हेटौँडा उपमहानगरपालिका वडा नं ४ का वडाध्यक्ष नविन सिग्देल, कुरियर संघ नेपाल बागमती प्रदेश अध्यक्ष रामप्रसाद पुडासैनी, एजी एक्सप्रेस कर्मचारी र सञ्चारकर्मीहरूको सहभागिता रहेको थियो।